請選擇項目 Where to go?
Shopping Cart

購物車內沒有任何商品。

[ameliabooking]

不專業的日記應用程式選擇 Source my new Dairy Applications

小臻現在是在用 Daylio 去做快速紀錄,方便統計習慣並在有需要時用作日記用。而這篇是用作記錄並分享選擇新的應用程式心得。全文盡量以粵語口語紀錄。

而家需要換走 Daylio 係因為唔再貼入需要,吸引唔到我繼續紀錄每日生活。原因有以下幾點:

  1. 相對地有少少貴,一年11.99鎂
  2. 有 Widget 但唔實用,顯示到我最後邊日紀錄過既心情有咩意義?
  3. APP icon 唔靚、係極唔靚,課左金可以設計得幾好但好快就會唔想理佢,但我都用左一年…⋯
  4. 用既時候總有一種遺和感但成年都未講得出係咩所以開始尋找新的秩序
  5. 唔支援 M1 Mac

所以今次要搵既替代 App 我會考慮幾個決定性因素:

  1. 要可以進行同步到 iPhone, iPad 或 M1 Mac 方便日常使用
  2. 介面要簡單直接直觀
  3. 唔介意課金但好介意連試都唔俾我試就要我課金真係冇信心
  4. 有實用同靚既 Widget + App icon(好重要!但如果未提供 Widget 其實可以接受)

而我既需求又係有啲奇怪既,如果單純寫日記其實唔會咁複雜,WordPress 就得啦~但我啲日記分成幾個唔同部份,所以又唔可以單純用文字處理,況且本人又懶,唔係成日拎著同一部裝置係手,比如我用 Macbook 既時間比用 iPhone 多好多,而夜晚又用iPad相對多。最後一個要求係鐘意啲日記整齊,容易返轉頭睇返曾經發生過咩事笑下自己咁~

個 App 保存資料上要夠安全呢件事係基本要求,所以一瞬間就排除左一堆 App Store 上有既 App。(明就明唔明唔好問!)

以下係過左 App Store 篩選戈關成功下載到 iPhone 中進行測試既 Apps(以批量下載先後次序排列):

  1. DailyBean
  2. 卡片日記
  3. Journey
  4. Breeze
  5. 日記note
  6. 簡單日記
  7. EMMO

下載返黎打開個 App,第一個篩選掉的是 EMMO。

其實概念上係幾似Daylio而且用比較生動既方式呈現,之但係呢⋯⋯個翻譯真係一個世界級既錯誤,所以忍唔到delete左,意思即係,如果你要揀 EMMO,我會建議你不如用Daylio、Breeze 或者 DailyBean。下面會講到呢兩個 App。

接著篩選掉的是 Breeze。

介面設計得是蠻可愛的,功能上我需要既都有齊,特別在呢個App有埋失眠心煩既心理測驗同指導課程咁,係課金項目黎但阿叔我又用唔著。而死症係設計得靚靚但個分類唔適合我呢啲有一定強逼症既怪人,所以都係唔啱用。 bye~

仲有一樣佢好挑動到我神經既係每次開呢個APP佢都會問:「你鐘唔鐘意我呀?」呀呀呀呀呀~~~!

接著落黎 5 個 App 我玩左一晚,功能上基本上都完整,當然佢地都有自己既不同啦!但使用上又好似冇太大壓力。不過要我篩選既我會選擇先篩走 Journey。

呢個 App 完善度高,但有幾個我比較在意既細節令我唔揀佢:

  1. 有課程
  2. 介面上支持繁體中文但只限介面
  3. 一定要成為會員先可以同步,而且同步冇列明係咪用 iCloud 定只能用 Journey 既伺服器

最後,好個人呢部份,我鐘意天藍色但呢個 App 既天藍色分佈我睇到覺得好唔舒服,唔係設計人所以唔識分析問題係邊,只能話俾你知係第一身感受。

接著落黎講下兩個都係由 Komorebi Inc. 開發既日記 App:日記note 同 簡單日記。模式同上面所講既 Journey 係好一致,但由日本公司出品所以可愛日系風,兩者差別上只有一個介面設計上相對簡約而且冇相冊功能,另一個係齊功能。另外,呢兩個 App 係課金下可以個性化埋 App icon,呢啲細節位我好欣賞。

而我唔需要用到相冊功能,所以 日記note 就被篩走了。

卡片日記。呢個 App 係中文翻譯得最好既一個,而且經 iCloud 同步可以係 iPad 上使用,其實加好多分,但用每用咭片方面呈現為首頁呢件事係佢既特色但都係我最缺乏好感既部份。設計上係十分具有設計感而且可以個性化選擇字型,模式上其實有少少似 WordPress,雖然各方面都幾好但未去到我覺得有種:「哇!係你喇!」既感覺。

而係簡單日記同卡片日記中來回切換下,我會選擇放棄簡單日記。主要原因係我需要更簡約直觀既設計去令我可以集中而平靜地進行日記紀錄,而相對下可愛日系風格既簡單日記唔夠卡片日記簡單,故簡單日記被我篩選走了。

而家剩返 DailyBean 同卡片日記,如果唔係資源有限我實兩個都課曬佢哈哈。DailyBean 係一個接近 Daylio 同 EMMO 既 App,但介面平易近人得多。不過有兩個問題:

  1. 未支援繁體中文,雖則用英文或者日文我都冇問題~而測試時係用英文
  2. 唔課金下唔知備份功能係咪用 iCloud,但佢有註明備份唔係 iOS 同 Android 共用咁應該博得過
  3. 測試時未識點個性化堆快速選項
  4. 唔支援 iPad

咁呢個時間就比較下價格先,比較出黎既結果係可以毫無留戀放棄 Daylio。

課金/AppDaylio卡片日記DailyBean
月費2.99鎂0.99鎂0.99鎂
年費11.99鎂7.99鎂8.99鎂
永久N/A12.99鎂14.99鎂
Daylio、卡片日記及DailyBean於2021年7月20日時的比較價格

卡片日記同 DailyBean 都係十分好既 App,如果側重於文字紀錄既、一日可能多於一篇既我建議卡片日記。而需要快速當 Checklist 做日記統計既我就建議 DailyBean。

而呢一刻,我做唔到決定。因為前者除左咭片顯示呢部份同冇多選做快速日記統計外,全裝置共用而且簡潔+一日多篇呢件事真係好適合。相對 DailyBean 就冇得用 iPad 進行紀錄同冇得一日多於一篇。

雖然呢篇係一篇評測紀錄但呢個網站始終係神秘學相關,所以⋯⋯做二選一塔羅占卜!

簡單快捷二選一:左邊為選用卡片日記的逆位星星、右邊為選用 DailyBean 的正位愚者

占卜結果有點有趣呢~簡言之選擇卡片日記會令我能做的事受限,而 DailyBean 卻滿載著可能性。所以先小課幾個月睇下情況點,這篇保留日後更新既可能性喔!


2021年8月13日更新:由於小臻決定再開卜術的修練日記所以發現DailyBean也沒能夠好好的處理這部份需求,就直接轉用了卡片日記,卡片日記可以一日多篇所以蠻適合不同主題的日記放在一起。而上面的占卜結果中說過DailyBean充滿著可能性這部份還真的不是蓋的,最近的更新加入了iOS的Widget功能,那個Widget的設計一如既往地好看又好用,有興趣的可以自行體驗一下喔!

1 則留言

發佈留言