係呢個你信就信、唔信都懶得同你解釋既領域咁多年真係冇諗過有一日會有一篇只寫自己個太陽星座：處女座。
仲加唔會諗到係因為一位冇化妝上台獻唱《蘇菲亞的波霸珍珠奶茶》而頗有名氣的90後處女座代表男歌手出左首新歌而令我特登出左篇文。本身只係諗著些牙上埃豬發表兩句就算，但係聽左幾次首歌，再加上坊間眾突然出現既星座大師s，想講既嘢突然多過預估既字數量 & 資訊量。心諗又冇理由人地碌個 story 啫我做乜又一大堆細粒字攻擊人地對眼呢～
好啦，入正題。為免有人㩒左入黎唔知發生緊咩事（多數戈個係我阿媽）所以補充返少少背景資料。首歌係林嘟嘟（官方名稱：林家謙）係2021年8月23日子夜發佈，歌名係《難道喜歡處女座》。我唔係音樂人，而且都自問有少少耳背同冇音感，所以冇音樂上既專業發表。呢方面唯一想講既係以處女座為題既旋律⋯⋯
有啲太歡欣⋯⋯
Hey~ 話曬處女座都係喻為人間原罪既存在黎架嘛，用咁開心既音樂去表達啊林生真係曳豬。俾我既感覺係：悶騷。詞庫唔大，暫時未搵到比呢兩隻字更貼切表達我內心想表達既意思。
歌詞中，對於處女座既描述其實都幾唔處女座。作為一名不學無術但又乜都識啲既獨修派自然薩滿巫師，係我既理解中，處女座係一個好冇個性既星座。太陽星座為處女座會好受星盤中有相位的星座、月亮星座同上昇星座既影響而出現左不一樣既「處女座式表達」。
認識一個人最快既方法係從對方既月亮星座中了解，而接觸既個個案中，總結出「因為（太陽星座）係處女座」被嫌棄既狀況中多數都有啲星座上既共同點去誘發「好難頂呀處女座」呢個言論。當然，總係有一堆星座大師一開口就會話：「哇，你處女座架！又挑剔又有潔癖好難頂呀！」Oh well~ 多數都係玄秘宮係天秤座同處女座既人會咁大聲。當然呢個可能你未必明，換返太陽星座黎講，會咁大聲係獅子座，唔大聲就係雙子座。
我成日都咁講，boi & gurl~ 咪咁大聲著先，科技普及，你開自己個星盤出黎睇下，分分鐘你自己就係戈個「處女座」，你估占星係心理測驗咩將人分類做12類咁就 work 咩～
而我個人既結論，以關鍵字方式去解析處女座，我會用「煉化」同「燃料」去形容。呢兩個關鍵特質係惹世人討厭既主要原因。人類種係一種喜好「不變」和夢想「永恆」的物種，所以同鐘意五時花六時變既變動星座已經係唔係好夾。基本不論個人特質，但普遍惹人污名既人變動星座數量都係相對多。處女座係土象星座中既變動星座，好衰唔衰個腦轉得快都算，土象變動一定係「可見型」變動。既然係可見型，即係好大機會會影響到當事人身處既環境，不論好壞，一要改變，身邊先有一半人會開始反感，尤其係一個相對穩定既環境中呢種會提出變革、優化、改進既人，都冇乜機會會俾人標籤係一個好人。如果全場都肯定處女座戈個推動同「會變更好」既心，咁戈個地方應該都幾濕滯⋯⋯
而詞中提及到處女座既潔癖同觀察入微。對於觀眾入微呢部份如果有風象星座插一插手，一個處女座其實會細心到過敏，唔算係好事，會太在意別人既目光同言詞。而潔癖上到底有幾唔了解處女座先會有咁無謂既諗法。同過處女座一齊生活既人都唔會太認同潔癖呢個講法，佢地只係對眼見既事情既精緻度同完善程度有堅持，但肯定唔係追求絕對物理乾淨既品種黎，係我既認知中，處女座擁有既只係精神潔癖，物理潔癖呢啲專業範疇都係交返俾白羊座。
精神潔癖其實係一啲濕濟嘢黎。比如一位太陽星座為處女座既原罪人類而家買左枝靚靚筆俾自己，佢好鐘意，如珠如寶咁對佢時，另一位非原罪處女座既人類種有禮貌咁借左佢呢枝靚靚筆可能簽個名咁。但簽戈下「哎呀～」枝筆失手跌左落地，執返起整返乾淨俾返原罪處女座，可能下一秒你就發現原罪開始黑面毒舌，多數唔夠細心既唔會知原因，然後就會怪罪係處女座度。冇既，戈位處女座可能發現花左少少或者崩左少少，然後又因為唔係佢自己本人既失手，觸發精神潔癖特性然後就會討厭借筆戈位同埋會換左枝筆佢。係戈位處女座既人心世界，枝筆同俾人搞大左其實冇分別，佢會接受唔到。
情願似白羊 似摩羯座
無謂纖細又 糾結像我
就咁既，上面都提過潔癖呢家嘢白羊座先係王者既時候，計埋山羊座（即係摩羯座）兩隻羊都係一意孤行既高手，以擅於唔做決定既處女座黎講，咁樣點睇都親和力高好多啦。纖細係處女座特質在此略過但糾結同選擇困難症係分別屬於山羊座同埋天秤座既，呢啲就唔好入罪俾處女座喇。
如果咁講，如果一個人對處女座作為情人感冒，咁基本上唔洗問一定係上演完逆‧港女劇碼黎。即係戈位情人唔夠上進～處女座只會對認為親近同認為可信任既人會講出對方唔體面既部份。但人類既社會性係有拒絕接收建言既習慣，除非戈位處女座有獅子座或者天秤座加護，否則出口都唔會太容易入耳。
但倒返轉，如果一個人有心改變自己時去問一個處女座，一般都會覺得處女座講嘢好有見地同諗嘢好全面好清晰。係呢一種特質既影響下，我成日都覺得處女座不如等人追就算，自己學乜鬼追人啫。一追人一上心對方就會覺得「好chur」、有壓迫感同埋嫌三嫌四等下略千字罪行。
放心，所有咁多優點既人都一定係 fuccboi，而人類種就係特別 into fuccboi type，我明既～
Anyway, 我都會成日同處女座個案講要收下把口。呢部份我就覺得東西方玄術都幾合拍。同樣以太陽作為曆法基礎下，處女座對應著十二地支月份中兩個五行屬「金」既月份，不論係陽金「申」定陰金「酉」，都係說話見解有種一針見血既特性。不過前者相對較有個性而後者比較唔識做決定，都係幾典型既處女座特質黎。
如果要用埋月亮曆法去分其實都好接近，都係將處女座分左兩個區隔去討論，但呢啲部份覺得係呢篇文中再提及真係會對街客黎講睇到好混亂。
唔覺唔覺講左好多，如果有興趣知更多，歡迎訂閱我呢個 WordPress 網站、留言互相學習下。我寫文一向隨心，作為一個處女座，我仲學習緊只係做自己想做又會做得開心既事情。
係呀，我明示緊我就生日呀，唔利申又會俾朋友話我悶騷。（不過作為原罪其實我利申完都係會俾 friend 繼續咁講哈哈～）
順便話埋俾你知呢個網站有埋 Telegram 頻道同埋 Instagram。
由今日起試下用欣賞既角度去認識你身邊既處女座吖，會有意想不到既收獲同助力架～
以上。
更新於2021年10月5日：突然記起要擺返媽咪（某Dr.樹）覺得好正既版本。
